MANILA, Philippines – Sa Hunyo pa magiging fully operational ang bago at kauna-unahang Overseas Filipino Workers (OFW) Hospital sa San Fernando City, Pampanga.

Sa ngayon, ayon kay Labor Secretary Silvestre Bello III, tanging mga ordinaryong gamutan at outpatient services lang muna ang maibibigay ng ospital habang hindi pa naililipat dito ang ibang medical equipment.

“Kasi ilalagay pa nila ‘yung P200 million worth of medical equipment ng dialysis, MRI, CT scan, at saka ‘yung ibang state of the art medical equipment,” anang kalihim.

Ang 1.5 ektaryang lupain na pinagtayuan ng ospital at nagkakahalaga ng P400 million ay donasyon ng provincial government of Pampanga.

Nasa P600 million naman ng gastos sa konstruksyon ang donasyon ng Bloomberry Cultural Foundation para sa pagsasakatuparan ng ospital.

Habang ang P200 milyong halaga ng medical equipment ay pinondohan ng Philippine Amusement and Gaming Corporation.

Ayon kay Bello, pangangasiwaan ng UP-Philippine General Hospital ang operasyon ng OFW Hospital.

Dagdag pa ng kalihim, naglaan din ng P250-million budget para sa ospital mula sa General Appropriations Act 2022. RNT/ JCM